《ꆏꇆꆏ您呀您》
——ꁱꌊꏪꐦꊿꋅꐧꌶꅉꋉꐛꇖꊰꈎꈭꏝꐛꌠꋨꏦ !
——特写此诗祝贺昭觉民中四秩华诞!
ꁱꊿ:ꀊꑞꈫꎆ
作者:阿西古者
ꆏꇆꆏ
ꃅꈎꃅꆪꉘꁮꇂꃴꄂꐎꄄꆈꌟꃅꁾꌦꐰꌦꃅꑴꇬ
ꆎꆹꆧꁨꈭꇍꄡꀧꆫꐩꌟꃅꅽꅑꅉꆏꅑ
ꃅꆳꂷꉐꌊꏓꐛꌠꁮꅉꆹꅽꅿꐩꋊꉬꄡꑟ
ꌩꅿꌩꏀꌩꃀꐛꇁꄾꄿꌠꆹꅽꅿꊫꂫꉬꇬꎷ
ꆏꁦꌺꌟꃅꅡꊪꀕ
ꆏꒊꃀꌟꃅꎵꑳꀕ
ꆏꑋꈌꐊꄉꉙꏦꀕ
ꆏꇆꆏ
ꄙꇁꃪꈎꏪꐦꒊꃀꂆꃚꌶꌺꄯꒉꀗꃚꐊꄉꒉ
ꅽꅿꂾꃚꈍꑋꄚꐊꎓꁨꀕꀋꐚ
ꄙꇁꃪꈎꃆꉻꉘꁌꒀꈩꉏꐞꁮꅉꌧꇊꏀꇊꑟ
ꅽꌺꅽꅪꈍꑋꄚꐊꁨꐞꄑꀋꐚ
ꆏꇆꆏ
ꉆꊰꁧꄩꉘꁮꑊꌤꏿꄮꇬ
ꏸꉬꁈꅪꎹꄓꈨꑭꐊꄉꆗꁍꀕꄮꇬ
ꁈꁧꇂꃴꅇꂷꄎꌬꀕꌠꉬꇮꊿꋅꋊꃅꁰꁱꐛ
ꁈꁧꇂꃴꊿꋅꋊꃅꁰꁱꉬꇮꅇꂷꄎꌬꀕꌠꐛ
ꅽꌺꅽꅪꇆ
ꈍꄮꇬꑌꉂꏣꉂꑟꂋꆚꀕ
ꅽꌺꅽꅪꇆ
ꈍꄮꇬꑌꑆꒉꊊꒉꐛꂨꀕ
ꆏꇆꆏ
ꃅꈊꃅꄜꈧꇁꆪꌌꈤꌠꆪꀱꈨꊂꈹꇬꎷ
ꐥꍂꈎꄜꈎꇁꆪꌌꈤꌠꆪꀱꈎꊂꈹꇬꎷ
ꋓꉪꀋꁨꃅꆎꆹꇖꊰꈎꀐꅊꇈ
ꊝꇉꀕꃅꇖꊰꈎꀐꅊꇈ
ꇖꊰꈎꇆꇖꊰꈎ
ꀋꅔꉇꌋꆀꀃꑍꌊꏓꐛꌠꇖꊰꈎ
ꃅꑌꇖꊰꈎ
ꂙꃨꀋꎔꋍꈓꃨꀋꋻ
ꃅꎸꇖꊰꈎ
ꇣꋦꀋꂄꋍꈓꋦꀋꋻ
ꃅꍵꇖꊰꈎ
ꊌꐨꀋꇎꋍꈓꊌꀋꋻ
ꃅꋆꇖꊰꈎ
ꇭꀧꉌꃀꐯꇯꊸꃅꊷꆣꀕꇬꎷ
ꆏꇆꆏ
ꇖꊰꈎꈝꃀꋋꏢꄩꄉꎭꅗꀐꌠꆏꇆꆏ
ꆏꈜꏁꄯꁯꐛ
ꆏꈜꄎꂷꇭꄻ
ꆏꈛꍝꌐꂷꐛ
ꁱꃅꁱꑟꇂꈪꈭꌠꐈꇁꅽꅿꑭꐨꐛ
ꑴꁱꑴꉻꈀꋽꀕꌠꍸꇁꅽꅿꇇꊂꐛ
ꅽꅿꆼꁠꐈꇁꌞꅿꌧꇐꌷꈜꈝꃀꇬꅂꊐꐛ
ꄯꒉꋍꋐꁏꊂꋍꋐꄅ
ꌶꌺꋍꁥꋩꊂꋍꁥꌞ
ꁮꅉꋍꂷꌧꊂꋍꂷꌧ
ꑓꁴꋍꄩꅐꊂꋍꄩꅐ
ꆏꇆꆏ
ꆏꊪꆏꉘꄉꌠꌩꁧꇓꁧꉬꇮꊽꃆꊽꂮꌧꅊꇈ
ꊷꇨꄮꐰꅞꇁꀊꄶꇂꃴꑌꇬꁌꃅꁌꇐꈤ
ꆏꃃꆏꉘꄉꌠꁬꃨꆰꃨꉬꇮꉂꇁꑟꏣꌧꅊꇈ
ꉌꊭꀋꀮꀋꃀꈍꑋꄚꄉꑧꇇꑣꇁꏹꀋꐚ
ꆎꆹꊿꋅꌺꇖꀄꂼꐚꄑꏿꅉꉬ
ꃅꈯꏨꆉꌟꃅꐙꅉꎳꅉꃅꅈꉬ
ꆎꆹꆈꌠꌺꇖꊫꂫꃰꇌꏁꅉꉬ
ꃅꏸꆥꁨꌟꃅꏄꇅꁤꇅꇄꅉꉬ
ꆎꆹꐤꐥꇖꊰꈎꀐꂷꉬ
ꆎꆹꐥꃅꐥꇬꎷꂷꉬ
ꆏꇆꆏ
ꀿꇁꃀꅇꐝꍠꀕꌠꆏꇆꆏ
ꑞꑌꌶꌺꎁꃅꄷ
ꌶꌺꉈꊪꉘꇉꄷ
ꌶꌺꉜꁨꁌꒉꄷ
ꅽꉙꇁꂘꅇꑖꈈꀕꀐꂼ
ꃅꐎꋋꇖꊰꈎꅑꅸꇁꌠ
ꉌꎭꌠꑌꆏ ꉌꌒꌠꑌꆏ
ꉌꐒꌠꑌꆏ ꉌꇿꌠꑌꆏ
ꉌꐡꌠꑌꆏ ꊂꈘꌠꑌꆏ
ꆏꇆꆏ
ꌺꄿꀿꆹꇔꄉꌺꐥꇛꇁꆧꌺꐛꌠꈀꄸꋌꃵꈤ
ꅩꄿꃀꆹꇔꄉꅪꐥꆀꃅꇖꈋꎔꌠꈀꄸꋌꃵꈤ
ꆏꇆꆏ
ꆎꆹꈍꄮꇬꑌꒀꃀꒉꎳꋍꂷꉬꅊꇈ
ꌺꄿꅪꎔꈍꑋꆎꐊꌧꇐꎾꃝꈭꏭꄐꑴꌦ
ꆎꆹꈍꄮꇬꑌꆀꃅꂘꃀꋍꂷꉬꅊꇈ
ꆀꌺꆀꅪꈍꑋꆎꐊꀎꋏꍸꇐꊛꏭꄐꑴꌦ
ꆏꇆꆏ
ꆎꆹꐤꅉꏀꅉꑟꅊꇈ
ꐤꅉꀻꎆꌄꆣꑟꅊꇈ